226 閱讀
筆者當年跟「馮老景」學到兩招三腳貓功夫，在「缸湖」打滾數十寒暑，至今仍能搵到兩餐，算是感恩。「三劍俠」中馮老景最先走，如今僅得「四叔」老而彌堅，間中想起那些年，不無唏噓。睇番家下啲後起之「獸」真係不忍卒睹。
日昨與簡前輩摸杯底吹水，講起對沖沽空大鱷與魚缸老千便咬牙切齒，話監管當局對彼等仁慈即係對普遍中小股民殘忍。佢話睇唔過眼要埋班搞個「芬」（基金）同佢哋片過。
行內無人不識老簡，他可是響噹噹人馬，不說他位列《Forbes》富豪榜，排名更在「小賭王」何猷龍和四太之上。他出身美資銀行高層，財技與金融知識是專家中的專家，在重組公司中更是數一數二、堪稱高手中的高手。佢想埋個芬閒過立秋。
其實，佢對沽空機構嘅運作瞭若指掌，不外乎選定對象、沽空、唱衰，跟住就平倉賺錢離場。知己知彼百戰百勝，筆者食住上，話有好嘢不妨預埋，勝算咁高何樂而不為？至於具體幾時成立，如何撼散啲大鱷，就要大統帥老簡下令，看來，缸湖從此「多事」矣。
咁近城隍當然要向佢求支「好籤」，講到「大茶飯」宏觀，老簡話全球環保大氣候，食正「乾淨」呢條水就想唔發都難。事實真係噃，即使能源都要用天然氣來取代。
近日，國家能源局就發佈咗《關於加快推進天然氣利用的意見》（徵求意見稿），提出逐漸將天然氣培育為全國現代能源體系的主體能源，大力發展天然氣分散式能源，在管網未覆蓋區域開展以LNG為氣源的分散式能源應用試點。
筆者想起老簡旗下正正就有隻食正呢條水嘅上市公司，中國天然氣（0931）今日市值還昂然企在百多億元，但股價就唔多願行。仲聽講有鱷都想狙擊呢隻嘢，老簡笑騎騎賣關子話，有麝自然香，駛乜周街唱？ 夠膽就放馬過來，包佢吃不完兜著走。藝高膽自大，加上公司現金滿瀉，街貨乾涸，沽空佢等於太歲頭上動土喎。
中國天然氣主要業務為發展液化天然氣「LNP」業務、經中央對外貿易經濟合作部批准在內地從事提供液化天然氣車輛、船舶及設備融資租賃服務、證券買賣、物業投資及透過放債業務提供金融服務，如今好多嘢已落實（筆者收到料，短期有嘢公布，將令人耳目一新），開始踏入收成，呢粒滄海遺珠不妨留意吓喇。
