(2020-4-5 轉載自蘋果)
滙豐有必要重新考慮補救剎停派息措施，最少要補償2019年末期息0.21美元t，否則就是失信。
聯盟牽頭人是一間名不經傳的基金公司叫順裕（Surich），banker朋友對這間公司無甚認識，網站資訊簡陋，更甚者英文grammar竟然錯陋頗多，簡單如We Succeed寫了We Success，pain point寫成plain point，相信不是面向高端客市場。
證監會紀錄show到這間基金公司2017年成立，前身叫ICO Fintech Capital（聽到ICO都覺得有點燶味）。2018年7月獲得4號牌（畀證券貼士客戶）及9號牌（資產管理服務），註冊辦事處雖然處於中環畢打街，但實體是商務中心Compass Office。
相關新聞：【何車500】分拆A股 東岳得益（何車）
有八卦banker check到順裕董事有三位，其中一位係近年崛起嘅地產商「寶庭重建」創辦人呂宇健，亦即是專教人炒樓嘅中小型業主會Ken Sir，聲稱自己係80後，有過百個物業，每年收租過百萬元。
Ken Sir打理嘅寶庭重建2018年11月突然升上神枱，躋身同李澤鉅、李家傑等地產商之列競投超貴價啟德地，當時公司代表解釋資金來源係「同本地基金合資」，又話基金「持續有資金流入，變得好快。」拍埋個時間點，寶庭重建提到嘅本地基金，同年7月攞到牌照嘅順裕資產管理公司好可能係其中一間，而基金客仔估計係一班本地業主。
滙豐小股東聯盟講到明已經串連到幾百個股東，不難想像呢班人就係業主會嘅人，但點解咁啱佢哋持有咁多滙豐，仲要衝出嚟維權？真係要佢哋去解說清楚。
不過業主會過去多年來出名以天價學費開班教人炒樓，包括將人類住屋劏成一格格，提升租金回報率至10厘。呢種魔鬼模式符合資本主義，亦可以用「市場有需求」萬能key去解釋，但本總裁覺得道德上係淪喪嘅，就算近年成立社企「民社相寓」都彌補唔到，由佢哋出馬去狙擊滙豐本身要打折扣。
但必須重申，滙豐的確有必要重新考慮補救剎停派息措施，最少要補償番2019年末期息0.21美元呢part，否則就係失信。銀行無信而不立，影響存戶信心，繼而影響香港金融中心形象。滙豐銀行近年有句廣告tagline——「承諾之後，才是承諾開始」，奉勸一句，千萬不要變成「承諾之後，才是反口開始」。