蔡清偉：東亞裝修靚 背後有玄機

前排去東亞銀行(023)九龍灣分行辦手續，銀行裝修好靚，電腦設備好High好先進，諗諗下東亞銀行入得過。唔怕買少少放度等釣魚。原因主要有以下幾個： 一，東亞係為數唔多的本地銀行股，創興(111)賣盤後，只剩下東亞、大新銀行(2356)、大新金融(440)，優質資產大把人爭； 二，大新系賣盤傳咗好耐，東亞賣盤迹象都唔少，銀行裝修就是一個例子。裝修好靚但沒有多少人用。如果唔係畀顧客用，要麼就係管理層大花筒亂使錢，要麼就係畀潛在投資者睇，賣個好價錢。 裝修好靚畀邊個睇 三，現在東亞經營管理權由李國寶家族控制，李氏父子直接持股比例不到7%，但其家族包括關聯人加埋持有約20%股權，合計仍為第一大股東。只是20%股權實在難以應付門外越聚越多的狙擊者。 截至2017年7月為止，東亞銀行的前四大股東分別是日本三井住友銀行、西班牙銀行Caixa Bank、國浩集團(053)及對沖基金Elliott，持股比例分別是17.5%、17.24%、14%、8%，四者加埋約56.74%。其中，國浩與Elliott都有虎狼之心。 四，現年79歲的李國寶希望在退休後將東亞交畀兒子管理，兩個兒子李民橋、李民斌都係東亞銀行執行董事，兩個兒子能否守住父親留下的王國，情況不容樂觀。 股權爭奪砝碼唔多 五，東亞近年砸鍋賣鐵賣唔少資產，2017年11月向中金投(605)出售部分小額貸款業務，套現11億元；之前又賣好靚的卓佳，賺30億元。一系列動作好容易令人聯想到「殺雞取卵」。 六，東亞管理水平令人詬病，Elliott選擇以此為切入點並非沒有理由。近排有單新聞，話說長沙灣青山道分行裝修工程，支票存款箱畀人不當遺棄。咁都得。 簡單來講，東亞有誘因都有迹象賣盤，裝修咁靚，側面反映單Deal有機會傾得七七八八啦。但請戰友留意，3至4月AGM前買少少好啦，有個唔係好熟的戰友，前兩年重倉440，第一年成績唔錯，第二年無晒聲。釣魚股唔好買太多。