(2018-10-29 高仁 信報)
各位「巴打」以為，今年首三季本港新股市場集資額按年大幅增加1.77倍，新上市數目急升46%，最大得益是港股的獨市經營者──港交所（00388）。惟「高仁指點」話你知，新股保薦人通過耍弄欺騙企業老闆伎倆，更有可能是穩賺不賠。
戴孤劃：（用普「東」話，即普通話加廣東話）前三季度，香港再度榮登新股集資額的全球第一位，真是可喜可賀！阿程，你發達啦！
廣告
程更計：發達！？最發應該係新股嘅sponsor（保薦人）囉！
高仁：其實，sponsor只要耍出4招絕密伎倆，「冧掂」啲企業老闆入局，一定可以做到有賺冇賠。
戴孤劃：既然有穩賺不賠的生意！？鐵哥們，你們快給我說吧！
程更計：第一招，spnosor開始時會好積極尋找目標企業，同一批有potential（潛力）上市嘅企業狂簽所謂sponsor's mandates（保薦人委任狀），但之後就會拖慢步伐嚟做。
拖慢步伐 騎牛搵馬
高仁：sponsor可能過咗一年半載都冇乜聲氣，到老闆問返佢哋轉頭嘅時候，sponsor就會話唔好意思，部門人手唔夠，想保證老闆隻job嘅質量，都係接唔到隻job。講到尾，佢哋騎牛搵馬，目的都係揀客。
程更計：高仁果然係「高人」。而第二招係第一招嘅加強版，sponsor除咗狂簽mandates之外，仲會狂收milestone payment（進度里程付款）。一般嚟講，呢個fee分四期嚟收，第一期簽mandate可能即收30%或40%，第二期入A1 form可能收20%，第三期hearing（聆訊）可能收30%，最後一期成功上市收埋尾數。
高仁：頭先都講過，sponsor可能根本唔夠資源去接job，但如果個客嘅「質地」唔係太差，都會幫手入埋A1 form，目的係為收埋下期嘅fee（費用）。其實，入表對個客都唔一定係一件好事，一來輸咗第二期嘅fee，二來上唔到市留有紀錄輸埋聲譽。
最後關頭要客妥協
戴孤劃：做到一半賺50%的fee，應該還算是fair吧！
高仁：但最怕有頭冇尾，半天吊。如果我講埋第三招嘅話，戴Sir應該唔會覺得fair。有部分sponsor唔會靠狂簽mandate搵食，但milestone payment都會各自設定最終日期，例如第二期fee會喺入表後或7月30日前（如果未入表）收20%。各位「巴打」記住重點係「或」呀！如果sponsor勁忙唔得閒理個客，拖住嚟做收到fee，唔使做又收到fee，你話勁唔勁！？
程更計：但老闆唔好以為，sponsor做到最後一期就係好，佢哋可能會同你講啲貨（股票）賣唔到，要你自己搞掂，否則上唔到市。一係個客願意割價求售；二係個客提高佣金先願意幫手賣貨；三係最離譜嘅同個客瓜分隻殼。如果個客三樣都唔願意，可以直頭唔做唔上市，但佢哋嘅fee照收。
戴孤劃：鐵哥們，這也太狠了！
本欄逢周一刊出
如想與高仁交流上市公司的財技個案及招數，請電郵至 koyan@hkej.com。
